Ka letsatsi lena 4 Phupu 1879, mabotho a makhooa tlasa bolaoli ba General Frederic Thesiger a tlatsitsoe ka mabotho a Basotho tlasa morena Molefe, mora oa morena Maketekete, mora oa morena Sekonyela, ba ile ba hlasela le ho liha puso ea borena ba Mazulu sebakeng sa Ulundi, ntoeng e ileng ea tuma ka hore ke ea Ulundi.
Morena Cetshwayo, morena oa Mazulu o ne a li bone matsoele. Empa a qhautsoa khoeling e hlahlamang, a ipatile morung oa Ngome.
Eaba ‘musisi Theophilus Shepstone, eo motse oa Port Shepstone o reheletsoeng ka eena, o arola naha ea Mazulu likoto tse 13, ke ha morena Molefe a tla fuoa Nquthu e akhang metse e kang Nkandla, eleng moo bana ba hae ba ntseng ba busa le kajeno. Hajoale ea busang ke morena Phallang Molefe, ebile setho sa letlole la borena la Ingonyama Trust.
Haele morena Cetshwayo eena a nkoa ke makhooa a mo koalla Kapa teronkong. Moo a neng a lokolloe ka selemo sa 1882 kamora ho “ikopela ts’oarelo” boreneng bo boholo ba Manyesemane, England.
Hamorao Shepstone a busetsa Cetshwayo boreneng, empa a mo hanela ho ba le masole. Morena Cetshwayo ea ileng a bolaoa ke ho lla ka ntho ka mpeng, o ile a hlahlangoa boreneng ke mora oa hae, Dinizulu, eo litloholo tsa hae eleng tsona tse ts’oereng borena bo boholo ba Mazulu kajeno.
