Ka letsatsi lena 15 Mots’eanong 1964, ‘moka oa matsatsi a 26 o neng o ts’oaretsoe motsemoholo oa Manyesemane, London, o ile oa fihla pheletsong moo Basotho le Manyesemane ba ileng ba lumellana ka moralo oa puso.
Hara tse ileng tsa ts’ets’ethoa ebile hore selemong se hlahlamang (1965) Basotho ba ngole fats’e Molao oa Motheo, ho be ho ts’oaroe likhetho tsa naha. Ebe ho thehoa matlo a mabeli a ketsamolao eleng paramente e tla boptjoa ka bakhethoa ba sechaba le ntlo ea Mahosana (Senate) e tla boptjoa ka marena a sehlooho le bathongoa ba nang le litsebo tse ikhethang ba tla thongoa ke Motlotlehi, eo eena e tlang ho ba Motlotlehi kamora boipuso bo tlang ho fanoa hang selemo kamora likhetho eleng 1966.
‘Moka ona o neng o qalile ka la 20 ‘Mesa 1964 o ne o tsamaisoa ke Duncan Sandys eo e neng ele letona le shebaneng le linaha tse busoa ke Manyesemane (colonies). Fotong ke karolo ea Basotho ba neng ba eme meleng ea ho khetha ka la 29 ‘Mesa 1965. Foto e nketsoe Maseru mohla monenene. Ho ne ho ngolisitse Basotho ba 416 962 empa hoa khetha Basotho ba 259 825.
