Ka letsatsi lena 11 ‘Mesa 1913, morena oa sehlooho oa Phamong morena Fako Nathaniel Griffith Lerotholi o ile a hlomamisoa ele Morena e Moholo oa Lesotho.
Hona hoa mo etsa morena oa pele nalaneng oa ho ba morena e moholo eo eleng Mokreste. Morena Fako o ne a hlahe kamora hore lesole la lekhooa Colonel Charles Duncan Griffith a etsoe ‘musisi oa Lesotho ka la 16 Phato 1871. Eaba o rehelloa ka lesole leo le bitsoang Griffith. Kantle ho rehelloa ka morena oa Maphonto, morena Faku. Morena Griffith o ile a romeloa Masite ha morena Bereng Letsie, moena oa ntatae morena Lerotholi Letsie. Morena Bereng a leka ho kenya morena Griffith sekolo empa a se hana. Eaba o’a mo bolotsa. Ha a se a khutla lebollong eaba o’a nyala. A nyala Sebueng morali oa ranganae, morena Nkuebe Letsie, morena oa sehlooho oa Quthing. Tsa manyalo a hae li sa tla… Ka 1895, a behoa Phamong ele morena oa sehlooho teng. Ka 1902 a teana le morena Mohlohlo eleng morena oa Maphonto ea neng a bolaee Hamilton Hope, ‘maseterata oa Quthing ka selemo sa 1880. Mohlohlo eo e neng ese ele Mokreste a khothaletsa morena Griffith ho inehela tumelong ea Sekreste. Ka 1904 morena Mohlohlo a ts’oaroa a ahloleloa lilemo tse 2 teronkong ka polao ea ‘maseterata oa Quthing ka selemo sa 1880. Ka selemo sa 1912, morena Griffith a kolobetsoa ke moruti Francois Laydevant OMI, oa Kereke e Kh’atholike ea eba Mokreste.
Ka la 28 Pherekhong 1913, morena e moholo oa Lesotho morena Letsie II, o ile a timela. A siea mohatsa hae, mofumahali Mahali le mora Tau ea neng a sa le monyane haholo. Morena Griffith a koptjoa ho kenela mofumahali Mahali ele hore a mo emarise, ebe bana ba tsoaloang moo eba majalefa a borena ba Lesotho. Empa morena Griffith a hana ka lereng tumelo ea Bokreste e’a mo “hanela” empa eena morena Griffith a ne a nyetse basali ba 28 ka palo. A re eena setulo sa borena a ke ke a se lula ka “se le seng” (setono). O batla ho se lula ka tse peli (a fuoe borena). Ka nako ena morena Griffith ea neng a hane sekolo, o ne a se a tseba ho bala le ho ngola a ithutile ka bo eena ka thuso ea moruti Laydevant. Ho feta mona, lesea Tau, eaba le fuoa pompong ke emong oa litho tsa lelapa la borena. Lesea la hlokahala eaba ha ho sa na mojalefa lelapeng la morena Letsie II. Eaba ka la 11 ‘Mesa 1913, ‘musisi Herbert John Gladstone kamora ho fuoa tumello ke Bara Ba Moshoeshoe, eleng marena a sehlooho a Lesotho, a hlomamisa morena Nathaniel Griffith Lerotholi e le morena e moholo oa Lesotho. O busitse ho fihleletse ka 1939 ha a hlokahala. Ho fihleletse tsatsing lena, ke eena feela morena e moholo ea sa pateloang Thaba Bosiu. O ne a kope ho pateloa kahara Kereke e Kh’atholike e Matsieng.
